~~1~~śrīmānvēṅkaṭanāthāryaḥ kavitārkikakēsarī |
~~2~~vēdāntācāryavaryō mē sannidhattāṁ sadā hr̥di ||
~~3~~vandē br̥ndāvanacaraṁ vallavī janavallabhaṁ |
~~4~~jayantīsambhavaṁ dhāma vaijayantī vibhūṣaṇam || 1 ||
~~5~~vācaṁ nijāṅkarasikāṁ prasamīkṣamāṇō
~~6~~vaktrāravindavinivēśitapāñcajanyaḥ |
~~7~~varṇatrikōṇarucirē varapuṇḍarīkē
~~8~~baddhāsanō jayati vallavacakravartī || 2 ||
~~9~~āmnāyagandhirucirasphuritādharōṣṭhaṁ
~~10~~āsrāvilēkṣaṇamanukṣaṇamandahāsaṁ |
~~11~~gōpālaḍimbhavapuṣaṁ kuhanā jananyāḥ
~~12~~prāṇastanandhayamavaimi paraṁ pumāṁsam || 3 ||
~~13~~āvirbhavatvanibhr̥tābharaṇaṁ purastāt
~~14~~ākuñcitaikacaraṇaṁ nibhr̥tānyapādaṁ |
~~15~~dadhnānimanthamukharēṇa nibaddhatālaṁ
~~16~~nāthasya nandabhavanē navanītanāṭyam || 4 ||
~~17~~hartuṁ kumbhē vinihitakarassvādu haiyaṅgavīnaṁ
~~18~~dr̥ṣṭvā dāmagrahaṇacaṭulāṁ mātaraṁ jātarōṣāṁ |
~~19~~pāyādīṣatpracalitapadō nāpagacchanna tiṣṭhan
~~20~~mithyāgōpassapadi nayanē mīlayan viśvagōptā || 5 ||
~~21~~vrajayōṣidapāṅga vēdanīyaṁ
~~22~~madhurābhāgyamananyabhōgyamīḍē |
~~23~~vasudēvavadhū stanandhayaṁ tat
~~24~~kimapi brahma kiśōrabhāvadr̥śyam || 6 ||
~~25~~parivartitakandharaṁ bhayēna
~~26~~smitaphullādharapallavaṁ smarāmi |
~~27~~viṭapitvanirāsakaṁ kayōścit
~~28~~vipulōlūkhalakarṣakaṁ kumāram || 7 ||
~~29~~nikaṭēṣu niśāmayāmi nityaṁ
~~30~~nigamāntairadhunā:’pi mr̥gyamāṇaṁ |
~~31~~yamalārjunadr̥ṣṭabālakēliṁ
~~32~~yamunāsākṣikayauvanaṁ yuvānam || 8 ||
~~33~~padavīmadavīyasīṁ vimuktēḥ
~~34~~aṭavī sampadamambu vāhayantīṁ |
~~35~~aruṇādharasābhilāṣavaṁśāṁ
~~36~~karuṇāṁ kāraṇamānuṣīṁ bhajāmi || 9 ||
~~37~~animēṣaniṣēvaṇīyamakṣṇōḥ
~~38~~ajahadyauvanamāvirastu cittē |
~~39~~kalahāyitakuntalaṁ kalāpaiḥ
~~40~~karuṇōnmādakavibhramaṁ mahō mē || 10 ||
~~41~~anuyāyimanōjñavaṁśanālaiḥ
~~42~~avatu sparśitavallavīvimōhaiḥ |
~~43~~anaghasmitaśītalairasau mām
~~44~~anukampāsaridambujairapāṅgaiḥ || 11 ||
~~45~~adharāhitacāruvaṁśanālāḥ
~~46~~makuṭālambimayūrapiñchamālāḥ |
~~47~~harinīlaśilāvibhaṅganīlāḥ
~~48~~pratibhāssantu mamāntimaprayāṇē || 12 ||
~~49~~akhilānavalōkayāmi kālān
~~50~~mahilādhīnabhujāntarasyayūnaḥ |
~~51~~abhilāṣapadaṁ vrajāṅganānām
~~52~~abhilāpakramadūramābhirūpyam || 13 ||
~~53~~hr̥di mugdhaśikhaṇḍamaṇḍanō
~~54~~likhitaḥ kēna mamaiṣa śilpinā |
~~55~~madanāturapallavāṅganā-
~~56~~vadanāmbhōjadivākarō yuvā || 14 ||
~~57~~mahasē mahitāya maulinā
~~58~~vinatēnāñjalimañjanatviṣē |
~~59~~kalayāmi vimugdhavallavī-
~~60~~valayābhāṣitamañjuvēṇavē || 15 ||
~~61~~jayati lalitavr̥ttiṁ śikṣitō vallavīnāṁ
~~62~~śithilavalayaśiñjāśītalairhastatālaiḥ |
~~63~~akhilabhuvanarakṣāgōpavēṣasya viṣṇōḥ
~~64~~adharamaṇisudhāyāmaṁśavānvaṁśanālaḥ || 16 ||
~~65~~citrākalpa śravasi kalayan lāṅgalīkarṇapūraṁ
~~66~~barhōttaṁsasphuritacikurō bandhujīvaṁ dadhānaḥ |
~~67~~guñjābaddhāmurasi lalitāṁ dhārayan hārayaṣṭiṁ
~~68~~gōpastrīṇāṁ jayati kitavaḥ kō:’pi kaumārahārī || 17 ||
~~69~~līlāyaṣṭiṁ karakisalayē dakṣiṇē nyasya dhanyāṁ
~~70~~aṁsē dēvyāḥ pulakarucirē sanniviṣṭānyabāhuḥ |
~~71~~mēghaśyāmō jayati lalitō mēkhalādattavēṇuḥ
~~72~~guñjāpīḍasphuritacikurō gōpakanyābhujaṅgaḥ || 18 ||
~~73~~pratyālīḍhasthitimadhigatāṁ prāptagāḍhāṅgapāliṁ
~~74~~paścādīṣanmilitanayanāṁ prēyasīṁ prēkṣamāṇaḥ |
~~75~~bhastrāyantrapraṇihitakarō bhaktajīvāturavyāt
~~76~~vārikrīḍānibiḍavasanō vallavīvallabhō naḥ || 19 ||
~~77~~vāsō hr̥tvā dinakarasutāsannidhau vallavīnāṁ
~~78~~līlāsmērō jayati lalitāmāsthitaḥ kundaśākhāṁ |
~~79~~savrīḍābhistadanu vasanē tābhirabhyarthyamānē
~~80~~kāmī kaścitkarakamalayōrañjaliṁ yācamānaḥ || 20 ||
~~81~~ityananyamanasā vinirmitāṁ
~~82~~vēṅkaṭēśakavinā stutiṁ paṭhan |
~~83~~divyavēṇurasikaṁ samīkṣatē
~~84~~daivataṁ kimapi yauvatapriyam || 21 ||
~~85~~iti śrīvēdāntācāryasya kr̥tiṣu gōpālavimśatiḥ ||